Биё э ки ме, ширине гиэзил ме! (Иди ко мне, мой сладкий мальчик!)

Биё э ки ме, ширине гиэзил ме!

(Иди ко мне, мой сладкий мальчик!)

( на родном языке моих предков- Горских евреев)

Эз зевер денишириге, хьэёт иму ухшеш зеренбу э е келе гъоб шишеи э фирее ёнгьорево ве пенжогьмитрои дуразе тенге бугъозлерово, э арт комики буьлуьнд бу келе гьуьндуьре гъопуй тэхдеи, дебугьо э жергей хунегьо э кучей Оскар.

Денишириге э мизрэхь, э незники хьэёт иму ведини биней гъэдимие ишколе N1 э мейдузи спортирево.

Рэхье гирошденге, э раче- берачей ишколе э дуразиней куче пенже шендебу богъчей шегьери э гьуьндуьре фирее доргьорево. Э зимисду бирэхьнее луьгегьой доргьо геймиш мибисдо э сипре палтаргьой верфи, тегьер нуьге гиэрус. Э вэхд поизи хэзон бире велггьой палуддоргьо , гъовогъгьо ве доргьой велеси бофденбу э сер хори ранге-биранге холинчей велгире. Э гермигьой гьеминони фирее луьгегьой савзе доргьо мидоно имуре э зир гъэнетгьой дори хуьшде, хомуш сохде мидо серини ве рэхьэти дуьлгьоймуре.

Дугъгьой гиов, рихденбугьо э богъче эз гъуз оморебугьо шефде куьгьне билогъ, кура биренбу э е келе ногьур, нерми доре зимире. И бу лап хубе жиге эри бил зере ве вечире куьрмгьой хорире пишой рафде э жэгириги.

Эз рач оводу бугьо гъирогъ дерьёгь дурте эденбу дураз бире ченджергеи рэхь овуни, гирошденбугьо э куьнди тилисиме суьгъде Каспий ме!

Хьэёт э кучей Оскара 29, гуйге бу еки эз эн лугъонде хьэетгьо, эриме оморенигьо, эз пелес дерьёгьиш лугъондте…

Келе ве чуькле гъэрмэгълуье сибсие сенгъгьо ве сенгъгьо э ранг хокисдери дебесдебу гьемей хори хьэете.

Чуькле дегьсале кукле гьоволенг мишенд э сер эни екигьо шумол бугьо, екигьо чупурлуь - энгуьллуь бугьо сенггьо, мэхьтел бире э у кор, ки э куьгьне девргьо инжо бу кон, диб дерьёгь. Ве ини имогьой ю хуьшден ю чендгъэде воисд эдей тимор сохде угьоре. Э расди лой хьэёт, э незники жергей хьэжетхунегьо буьлуьнд бу пенжтэбэгъэи хуне ве э ён эну гьуьндуьре, гуйге те асму, тов эн келе пичгьой куьмуьри.

Дананиёй дегьсале гизил э товун доргьо-мэхьсуьлгьо умехьэли бу энжегъ и се келе доргьой тути не е гъолинде тегьенг сипре онгур огъодеи, поисдебируьтгьо э ён порогъ дедейхолуй ме И кукле зигьисдени э и хьэёт, комики гуьрд сохди гьеждегь(18) кифлетгьоре. Геделе гуйге гьич гьис не сохде, нис диренбу инжо зигьисдеи гъуншигьоре. У гешденбу э гиэрэй энугьо, гирошденбу эз пушой энугьо, гуйге угьо гьуьндуьре луьте доргьои, луьгесуьзгьо ве велгсуьзгьо, энжегъ тие сутунгьо. И доргьо себэхьмунде мивадарафдуьт эз тенге лэгиэй чорекей шишеи, шехьэнгум мивогошдут э хьэёт, гиэрэбир дарафде э хьэжетхуней жэгимиети, песде дарафде гьер мерд э хунегьошу.

Кукле поисдебу э минжи келе хьэёт э е хинике руз поизи, шогьвор дерьёгьи ве хуьшге ворвори махачкалеи, сес товгьой куьмуьри эеки гуьрд бире зенденбу музик поизире.

Гlэил нуьшд э сер хори, дениши чум не вегуьрде эз хуней хуьшде, э гъэд комики э вэхд пири, муй сипи бире вэгlдо, тэхьно мундебугьо дедейхолуй ю эдембу диглегьо душунде э сер куьгьне кирагаз. Песде мидениши э лой гъопу, сэхд мисохд раче дуьруьжде э ранг михэки бугьо чумлегьой хуьшдере, фикир сохде, чуьтам эз дер гъопу диреморенуьтге суьфде гиэзизе суьгъде бебей ю Иешуа, песде лап ю омбар хосденбугьо холуй Борух, комиреки у рэхь сохдебу и шеш сал пушо э госпиталь лешгери. Екем вэхд гирошде бэгъде э сер миофдо, э хэёл мираси угьо зинде нисдуьт гуфдире, угьо зу муьрдет. Песде мивокурд чумгьоре, гене денишире э лой гъопу э гузети э дедей хуьшде. И кукле гьемише гузет бу э оморей дедей: себэхь, пишнеи ве шехьэггум, чумерэхь эн дедей бу гьер вэхд, кей миёв мама юре гъэл мигируь, шелгъэме муйгьой юре тимор мисоху…

Дедейхолу эз зурево эдей хьэрой зере, оголзере уре : « Юрик, Юнун, инжо биё, инжо биё…».

Сеггьой хьэети кура бире, дегешде э иловлей кукле эдембируьт лисире чуькле хинике деслегьой гиэиллере. И сеггьоре энжэгъ дедейхолу ве гъовумгьой ю дошде-хорундембу. Э товун ю хуьшден ю куклей жугьури гуфдире, у мидануь эз 5-6 сал бэгъде э хори гlэзизе Дагъисдуй ю нери, э дуре мескенгьо. Оммо э и сэриэт и чуькле кукле нуьшди э гъэдиме дон дерьёгь. Эри эну одомигьо э е дэгъдэгъэ эз доргьо чарусдуьт э соегьо. Соегьо эдет луьнг шенде гирошде эз сер ногьургьо, дуз рафде рэхьэ, сер не жумунде ве сугърезанигьоре гъэд не сохде, тегьер тиргьой сутуни эдет пой вечире. Гиэилле эри энугьо гуйге нисди! Гиэрэбир соегьо куьнд оморе эз сеггьо тимор мисохдут угьоре, оммо тигъэт не доре, гьич чум не доноре, невинирере хуно и куклере мишишируьт юре, луьнг мишендуьт эз сер эз хиники э е чуькле лэхтэ чаруьсдебугьо куклере.

Дедейхолу, дедейка- ини е теке одоми, комики эз дуьли хосденбугьо мере, энжегь уре ме герек бируьм: « Инжо биё, Юрик… Инжо биё…»

Гиэрибир геделе мидарафд э куьгьне сарай дедейхолу, э комики ченд жерге дечире оморебу хьуьзуьмгьо ве кутукгьо. Сэхд мисохд сула-сула бугьо дере, мивекенд эз хори куьгьне туьфенг эн бебейхолуре ве келе хэнжел бебере, дураз, тиж ве э дуьм остгъуирево бугьо. Мивегуьрд гьеммере э дуьдеси, мигировунд эз келе тиракгьой дери ве гъэленж гуьрде, мишенд гуниле э лой гирошденбугьо соегьо. Чендгъэдеш хьэрекет мисохдге, гене соегьо кем ней биренбу…

Мибисдо гьечи: е- дуь гиле э мегь ю еки эз доргьо-соегьо мичарусд э холей Тианат, гъунши дедейхолуй ме. И рэхьмедуьле дуьлочугъэ холе миберд геделере э кинотеатр « Комсомолец» енебуге « Темп», « Пар зеренуьт дурнагьо» эри винире тозе киноре. Эз кинотеатр вогощденге холей Тианат андурмиш мисохд э мог ъбун биребугьо кукле, игид эн кино не муьрди гуфдире, у мизию гуфдире, уре духдиргьо хилос мисоху ве у ёгъин эвленмиш мибу э е теке севгил хуьшдерево Вероника!

Мигирору салгьо, и кукле келе мибу, ве энжэгъ тек-теке соегьо эз у лешгер соегьой дори, э мэхьэл барасигьо, бесгъунигьо,бэхди- мозолменди, дерди ве могъбуни мичарут эри эну э е шоре гьорой хоше гиэили: « Инжо биё, раче балай ме, раче гиэл ме Юрик!!!

Пицунда, январь 2024 сал

Перевод на горско-еврейский язык Розы Мардахаевой